10 may 2026-cı il tarixində Dövlət İmtahan Mərkəzinin təşəbbüsü, Elm və Təhsil Nazirliyi və Lənkəran-Astara Regional Təhsil İdarəsinin dəstəyi ilə Lənkəran şəhəri M.Bağırov adına 1 nömrəli tam orta məktəbdə regionun təhsil müəssisələrində xarici dil fənnini tədris edən 90 müəllimlə görüş keçirilib.
Görüşdən əvvəl Mərkəzin əməkdaşları Azərbaycan xalqının Ümummilli lideri, müstəqil Azərbaycan dövlətinin banisi və qurucusu Heydər Əliyevin anadan olmasının 103-cü ildönümü ilə əlaqədar şəhərin mərkəzi meydanında ucaldılmış abidəsini ziyarət ediblər.
Tədbiri giriş sözü ilə açan DİM-in Lənkəran Regional Bölməsinin müdiri Nicat Hüseynov görüşün əhəmiyyətindən və regionlarda bu cür maarifləndirici tədbirlərin keçirilməsinin vacibliyindən danışıb.
Daha sonra DİM-in Dövlət dili və xarici dillər üzrə şöbəsinin müdiri Könül Hacıyeva çıxış edərək xarici dil fənləri üzrə qiymətləndirmə sistemində həyata keçirilən yeniliklər, ölçmə meyarları və tətbiq olunan yanaşmalar, habelə imtahan modelində nəzərdə tutulan yazı tapşırığı haqqında ətraflı məlumat verib, metodiki tövsiyələrini bölüşüb. Qeyd olunub ki, yeni imtahan modelinin əsas məqsədi şagirdlərin dil bacarıqlarını daha real, funksional və kommunikativ kontekstdə qiymətləndirməkdir.
Diqqətə çatdırılıb ki, xarici dil fənni üzrə yeni model çərçivəsində 2027-ci ildən etibarən minimum 100 sözdən ibarət kiçikhəcmli mətn yazılmasını tələb edən yazılı tapşırıq tətbiq olunacaq. Bu tapşırıq şagirdlərin yazı bacarığını, məntiqi ardıcıllıqla fikir ifadə etmə və dil vasitələrindən istifadə səviyyəsini daha obyektiv qiymətləndirməyə imkan verəcək. Vurğulanıb ki, bu dəyişiklik eyni zamanda tədris prosesində şagirdlərin yazı bacarığının sistemli inkişafına daha çox diqqət yetirilməsini zəruri edir.
Görüş çərçivəsində qeyd olunub ki, Lənkəran-Astara iqtisadi rayonu üzrə xarici dil fənni nəticələrində müsbət dinamika müşahidə olunur. Belə ki, 11 illik təhsil səviyyəsi üzrə buraxılış imtahanlarında ümumi orta statistik bal 2024/2025-ci tədris ilində 30,33 olduğu halda, 2025/2026-cı tədris ilində 31,1-ə yüksəlmişdir. Qeyd edilib ki, nəticələr region üzrə xarici dil hazırlığında müəyyən irəliləyişin olduğunu göstərir. Bununla yanaşı, iqtisadi rayonun tərkibinə daxil olan rayonlar arasında nisbi bal göstəricilərində fərqlər müşahidə olunur ki, bu da bəzi istiqamətlər üzrə metodik dəstəyin və tədris prosesinin daha da gücləndirilməsinin vacibliyini göstərir.
Plenar hissədən sonra görüş ingilis, rus və fransız dili fənləri üzrə seminarlarla davam etdirilib. Dövlət İmtahan Mərkəzinin fənn kuratorları Fatma Ağayeva (fransız dili), Gülayə Cavadova (ingilis dili) və Xalidə Babaşova (rus dili) tərəfindən tam orta (11 illik) təhsil səviyyəsi üzrə imtahan modelində nəzərdə tutulan dəyişikliklər barədə ətraflı məlumat verilib.
Seminarlar çərçivəsində iştirakçılara xarici dil fənni üzrə minimum 100 sözdən ibarət kiçikhəcmli mətn yazılmasını tələb edən yazılı tapşırıq, onun qiymətləndirmə meyarları və nümunə cavablar təqdim olunaraq müzakirə edilib. Sonda iştirakçıları maraqlandıran suallar cavablandırılıb, təqdimatdan sonra sorğu keçirilib və müəllimlərlə yeniliklər barəsində geniş fikir mübadiləsi aparılıb.
