22 – 25 sentyabr 2024-cü il tarixlərində ABŞ-nin Pensilvaniya ştatının Filadelfiya şəhərində “Süni intellekt təhsilin qiymətləndirilməsinin təkmilləşməsinə necə kömək edə bilər"? mövzusunda Təhsilin Qiymətləndirilməsi üzrə Beynəlxalq Assosiasiyanın (IAEA) 49-cu illik konfransı keçirilib. Təhsildə Qiymətləndirmə Xidmətinin (ETS) ev sahibliyi etdiyi konfransda Dövlət İmtahan Mərkəzinin (DİM) Texnoloji nəzarət və imtahan materiallarının avtomatlaşdırılmış çapı şöbəsinin müdiri Tural Mustafayev, Beynəlxalq əməkdaşlıq şöbəsinin müdiri Elmir Şirinov, Dövlət dili və xarici dillər üzrə şöbənin müdiri Könül Hacıyeva və həmin şöbənin aparıcı məsləhətçisi İlahə Nəbizadə iştirak ediblər.
DİM-in əməkdaşları 22 sentyabr 2024-cü il tarixində konfrans çərçivəsində keçirilmiş “Formativ qiymətləndirmə bacarıqlarının təkmilləşdirilməsi: İnkişaf etməkdə olan ölkələrin təhsilinə təsirləri”, “Genişmiqyaslı qiymətləndirmələrdə tələbə və qrup davranışlarını anlamaq və öyrənmək üçün metodologiyalarda yeniliklər” və “Yazı işlərinin qiymətləndirilməsində süni intellektin istifadəsinin ən yaxşı təcrübələri” adlı seminarlarda iştirak ediblər.
IAEA-nın prezidenti Meri Pitoniak və ETS-in icraçı direktoru Amit Sevakın açılış nitqləri ilə başlayan konfrans, əsas məruzəçilərin çıxışları, panel müzakirələri və paralel sessiyalarla davam etmişdir.
Konfransın ilk günündə K.Hacıyeva “İmtahan formatının namizədlərin ehtiyaclarına uyğunlaşdırılması: hibrid imtahan modelinə doğru kiçik addım”, İlahə Nəbizadə isə “Azərbaycanda tam orta təhsil səviyyəsində ingilis dili üzrə oxu bacarığını yoxlayan test tapşırıqlarının spesifikasiyaları” adlı təqdimatlarla çıxış ediblər (konfransın proqramı – https://bit.ly/4ew0szN). K.Hacıyeva öz təqdimatında təhsil sahəsində müşahidə olunan davamlı inkişafı nəzərə alaraq, imtahan mərkəzlərinin də namizədlərin artan ehtiyacları və gözləntilərini qarşılamaq üçün daim yeniliklər etməli olduqlarını və bir çox imtahan mərkəzlərinin artıq bu rəqəmsal inqilaba cavab olaraq, hibrid imtahan modelini tətbiq etdiklərini qeyd edib. Çıxışı zamanı o, akademik dürüstlüyün qorunub saxlanılmasında, müxtəlif səviyyələrdə və imtahanlarda imtahan verənlərin ədalətli və bərabər imkanlar yaradan imtahan təcrübəsinin təmin edilməsində DİM-in mühüm rolu olduğunu vurğulayıb. İ.Nəbizadə isə öz təqdimatında tam orta təhsil səviyyəsində buraxılış imtahanının modeli, qiymətləndirilən bacarıqlar, xüsusilə də, oxu bacarığı haqqında məlumat verib. O, öz çıxışında 2024-cü ildə keçirilmiş buraxılış imtahanlarında istifadə edilmiş oxu bacarığını yoxlayan test tapşırıqlarının spesifikasiyaları və statistik təhlillərinin nəticələri barədə məlumatlar təqdim edib.
Konfransın növbəti günündə E.Şirinov “IAEA-in təqdim etdiyi Təhsilin Qiymətləndirilməsi Təşkilatları üçün Beynəlxalq Standartların yenilənməsi” mövzusunda keçirilmiş panel sessiyada iştirak edib. Pakistanın Ağa Xan Universitetinin Qiymətləndirmə Mərkəzinin icraçı direktoru Navid Yusufun moderatorluğunda keçirilən panel sessiyada həmçinin Zambiyanın İmtahanlar Şurasının icraçı direktoru Maykl Çilala da iştirak edib. Standartların işlənib hazırlanmasını həyata keçirən IAEA-in tanınma komitəsinin üzvləri də onlayn şəkildə müzakirələrdə iştirak ediblər. Məlumat üçün bildirək ki, DİM 2023-cü ildə standartların təkmilləşdirilməsi üzrə keçirilən pilot layihə çərçivəsində standartlar əsasında özünüqiymətləndirmədə iştirak etmişdir. Sessiya zamanı E.Şirinov əvvəlcə DİM-in fəaliyyəti, sahə üzrə yaxşı təcrübələri, o cümlədən əldə olunan nailiyyətlər və tətbiq olunan yeniliklər barədə iştirakçıları məlumatlandırıb. Sonra isə o, DİM-in pilot layihədə iştirakı zamanı əldə olunan nəticələri, sərf olunan resursları və layihədə iştirakın faydaları ilə bağlı moderator tərəfindən verilən sualları cavablandırıb, həmçinin təqdim olunan standartların daha faydalı şəkildə istifadəsi ilə bağlı təklifləri bildirib (Beynəlxalq Standartlar – https://bit.ly/3zyuHXU).
Qeyd edək ki, DİM (əvvəlki TQDK-nın fəaliyyəti də daxil olmaqla) 1999-cu ildən IAEA-nın daimi üzvüdür, 2007 və 2019-cu illərdə təşkilatın illik konfranslarına ev sahibliyi edib.
Konfrans haqqında ətraflı məlumatı verilmiş keçiddən əldə etmək mümkündür: http://bit.ly/3ZDhisp
