22 may 2023-cü il tarixində Dövlət İmtahan Mərkəzində AMEA-nın həqiqi üzvü, filologiya elmləri doktoru, professor, əməkdar elm xadimi, millət vəkili Nizami Cəfərov, AMEA-nın həqiqi üzvü, filologiya elmləri doktoru, professor Möhsün Nağısoylu və AMEA-nın həqiqi üzvü, Folklor institutunun direktoru, filologiya elmləri doktoru, professor Muxtar İmanov, Azərbaycan Respublikası Təhsil İnstitutunun əməkdaşları: direktor müavini Ülkər Babayeva, Təhsil standartları və proqramları şöbəsinin müdiri Mənsur Məhərrəmov, filologiya elmləri namizədi, dosent Əsgər Quliyev, “Azərbaycan dili” dərsliklərinin müəllifi, filologiya üzrə fəlsəfə doktoru Rafiq İsmayılov və Azərbaycan Dillər Universitetinin Azərbaycan dilçiliyi kafedrasının dosenti Səbinə Əliyevanın iştirakı ilə “Azərbaycan dili fənni üzrə bilik və bacarıqların qiymətləndirilməsi məsələləri” mövzusunda dəyirmi masa keçirilmişdir.
Tədbirdə həmçinin Dövlət İmtahan Mərkəzinin Direktorlar Şurasının sədri Məleykə Abbaszadə, Yoxlama-ölçmə materiallarının işlənməsi departamentinin müdiri Natiq Əliyev, Metodika və dərsliklərin monitorinqi şöbəsinin müdiri Afiqə Batıyeva və DİM-in digər mütəxəssisləri, o cümlədən DİM-in ekspertləri: Heydər Əliyev adına Müasir Təhsil Kompleksinin müəllimi Sədaqət Əliyeva, Türkiyə Dəyanət Vəqfi Bakı-Türk liseyinin müəllimi Saməddin İbrahimov, Bakı şəhəri 299 nömrəli məktəb-liseyin müəllimi Nuriyyə Verdiyeva, AMEA Folklor İnstitutunun böyük elmi işçisi Zəfər Fərhadov, Bakı şəhəri 281 nömrəli məktəbin müəllimi və filologiya üzrə fəlsəfə doktoru Flora Osmanova iştirak etmişlər.
M. Abbaszadə “Azərbaycan dili fənnindən buraxılış imtahanlarının nəticələri” mövzusunda təqdimatla çıxış etmiş, 2022-2023-cü tədris ili üzrə buraxılış imtahanlarının nəticələrinin müqayisəli təhlilini təqdim etmişdir. Dövlət dili və xarici dillər üzrə şöbənin müdiri Könül Hacıyeva isə “Xarici dillərin qiymətləndirilməsi” mövzusunda təqdimat etmişdir.
Təqdimat mövzuları ətrafında müzakirələr aparılmış, buraxılış imtahanlarında Azərbaycan dili fənni üzrə istifadə olunmuş tapşırıqların fənn kurikulumunun təlim nəticələrinə və məzmun standartlarına uyğunluğu, mətnlərin məzmununun Azərbaycan dilinin nitq normalarına, dil qaydalarına və üslubi imkanlarına uyğun olması, xarici dil fənlərindən fərqli olaraq, bir tədris dili kimi Azərbaycan dili fənninin tədrisinə verilən tələblərin daha ciddi olması məsələləri müzakirə edilmişdir.
Müzakirədə Azərbaycan dilinin tədrisində bir çox problemlərin olduğu, müvafiq fənn üzrə tədrisin səviyyəsini yüksəltməyə böyük ehtiyac duyulduğu qeyd edilmişdir. Məktəblilər üçün orfoqrafiya və orfoepiya lüğətinin təkmilləşdirilməsi zərurəti diqqətə çatdırılmış, Azərbaycan dili fənninin tədrisi ilə bağlı şagirdlərə təqdim edilən mətnlərin məzmununa, həcminə verilən tələblər müzakirə edilmişdir.
Akademiklər N.Cəfərov, M.Nağısoylu və M.İmanov qeyd etmişlər ki, Azərbaycan dili fənni üzrə oxuyub-anlama, yazı bacarıqlarının qiymətləndirilməsinə xarici dil fənləri ilə müqayisədə daha ciddi tələblər qoyulmalıdır. Buna səbəb kimi şagirdlərin gələcək həyatında ana dili üzrə oxuyub-anlama, yazı bacarıqlarının önəmli rol oynaması göstərilmiş, həm şəxsiyyətlərin fərdi inkişafında, həm də cəmiyyətin tərəqqi etməsində ana dilinin inkişafının rolu xüsusi qiymətləndirilmişdir.
Göstərilən məsələlərlə bağlı çıxış edən S.Əliyeva, S.İbrahimov, N.Verdiyeva və F.Osmanova da öz fikir və təkliflərini bildirmişlər.
Müzakirə nəticəsində buraxılış imtahanlarında Azərbaycan dili fənni üzrə istifadə olunmuş tapşırıqlarla yoxlanılan bilik və bacarıqların fənn kurikulumunun təlim nəticələrinə və məzmun standartlarının tələblərinə uyğun olduğu öz təsdiqini tapmışdır.
Görüşdən əvvəl qonaqlar DİM-də yaradılmış və ölkəmizin milli qiymətləndirmə sisteminin tarixini əks etdirən muzeylə də tanış olublar.
