Təlimlər Bakının Yasamal, Binəqədi, Xətai, Nərimanov, Səbail, Nəsimi, Qaradağ rayonları, həmçinin Abşeron, Sumqayıt, Lənkəran, Şəmkir, Göyçay, Xaçmaz, Tovuz, Gədəbəy, Zaqatala, Qax, Balakən, Oğuz, Qobustan, Kürdəmir, Ağdaş, İmişli, Sabirabad, Beyləqan, Ağdam, Füzuli, Tərtər, Quba, Astara, Biləsuvar şəhər və rayonları üzrə zal nəzarətçisi qismində imtahanlara cəlb olunan təcrübəsi az və imtahanlarda ilk dəfə iştirak edəcək şəxslər üçün aparılıb.
DİM-in mərkəzi aparatının və regional bölmələrinin əməkdaşları tərəfindən aparılan onlayn təlimlər imtahan prosesinin daha səmərəli izahını və yaranan sualların daha dolğun cavablandılmasını təmin etmək üçün 20‑25 nəfərlik qruplarla təşkil olunub.
Təlimlərdə ilk olaraq zal nəzarətçiləri ölkəmizdə koronavirus (COVID-19) pandemiyasının yayılmasına qarşı görülən maarifləndirmə tədbirləri və infeksiyanın profilaktikasına dair ümumi metodiki göstərişlərlə tanış olublar.
Bundan əlavə, seminarlarda tam orta (ali təhsil müəssisələrinə qəbul imtahanının I mərhələsi) və ümumi orta təhsil səviyyəsi üzrə buraxılış imtahanları, eləcə də tədris dili Azərbaycan dilindən fərqli olan ümumi təhsil müəssisələrinin məzunları üçün Azərbaycan dili fənni imtahanının texnologiyası və imtahanın gedişi ilə bağlı qaydalar izah edilib. Həmçinin daha əvvəlki imtahanlarda baş vermiş xüsusi hallar və qayda pozuntuları barədə zal nəzarətçiləri məlumatlandırılıb.
Təlimlərdə tam orta təhsil səviyyəsi üzrə buraxılış imtahanlarında cavab vərəqlərinin doldurulması, açıq tipli test tapşırıqlarında cavabların qeyd olunması və xarici dil fənni üzrə “dinləyib-anlama” bacarıqlarının yoxlanılması üçün istifadə olunan dinləmə qurğusunun işlədilməsi qaydaları da nəzarətçilərin diqqətinə çatdırılıb.
