Azərbaycan Respublikasının Hərbi Prokurorluğunun təşkilatçılığı ilə “Zəfər varisləri” layihəsinə - internat məktəblərinin şagirdlərinin hərbi təhsil müəssisələrinə qəbula hazırlanmasına, imtahanlarda iştirak etmək üçün qeydiyyatına, eləcə də qəbul olunduqdan sonra hərbi təhsillərini davam etdirmələrinə dəstəklə bağlı tədbirlərin icrasına başlanılıb.
Layihə çərçivəsində Müdafiə Nazirliyinin Milli Müdafiə Universitetinin, C.Naxçıvanski adına Hərbi Liseyin, Dövlət Sərhəd Xidmətinin Xüsusi Məktəbinin nümayəndələrinin, həmçinin Dövlət İmtahan Mərkəzinin əməkdaşı Eltun Süleymanovun iştirakı ilə 1 və 2 nömrəli ümumi təyinatlı internat tipli ümumtəhsil məktəblərinin şagirdləri ilə görüşlər keçirilib. Görüşdə şagirdlərə hərbi təhsil müəssisələri barədə geniş məlumat verilib, qəbulla bağlı videoçarxlar nümayiş etdirilib. Həmçinin təhsillərini bu müəssisələrdə davam etdirmək arzusunda olan şagirdlərin sənədlərinin toplanılması və qeydiyyatının aparılmasına dəstək göstərilib, onların imtahanlara səmərəli hazırlaşmaları üçün DİM-in vəsaitləri qeyd olunan məktəblərin kitabxanalarına hədiyyə olunub.
Görüşdə bir daha vurğulanıb ki, bu şagirdlər digər sahələrdə olduğu kimi hərbi təhsil müəssisələrində təhsil müddətlərində də Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın daimi diqqət və qayğısını görəcəklər və hərbi təhsillərini bitirdikdən sonra Müzəffər Ali Baş Komandan İlham Əliyevin rəhbərlik etdiyi Silahlı Qüvvələrimizdə zəfərin varisləri kimi qürurla xidmət edəcəklər.
