Dövlət İmtahan Mərkəzinin (DİM) İdarə Heyətinin sədri Məleykə Abbaszadə Qazaxıstana işgüzar səfəri çərçivəsində 18 iyun 2025-ci il tarixində bu ölkənin Milli Test Mərkəzinin (MTM) sədri Bolatbek Abdrasilov ilə görüşüb.
Görüş zamanı hər iki qurumun fəaliyyət istiqamətləri və həyata keçirilən müxtəlif imtahanlar barədə ətraflı məlumat verilib. Həmçinin MTM-in nümayəndələri tərəfindən kompüter vasitəsilə keçirilən imtahanların işləmə mexanizmi və müxtəlif regionlarda təşkil edilən imtahanların statistikası üzrə təqdimatlar edilib. Daha sonra qiymətləndirmə sahəsindəki yeniliklər və təcrübələr, o cümlədən rəqəmsal imtahan sistemlərinin tətbiqi, imtahanların təhlükəsizliyi, imtahan nəticələrinin süni intellekt vasitəsilə operativ emalı və statistik təhlillərin aparılması ilə bağlı qarşılıqlı təcrübə mübadiləsi aparılıb.
Görüş çərçivəsində DİM-in İdarə Heyətinin sədri M. Abbaszadəyə MTM-in imtahan infrastrukturu, texnoloji imkanları və yeni tətbiq olunan metodologiyalar, həmçinin süni intellektlə işləyən qaynar xətt layihəsi barədə məlumat verilib və müvafiq istiqamətlərdə qarşılıqlı təcrübənin öyrənilməsinə dair müzakirələr aparılıb.
Sonda iki qurum arasında əməkdaşlıq əlaqələrinin gücləndirilməsi, o cümlədən qiymətləndirmə və imtahanların təşkili sahəsində qabaqcıl təcrübənin öyrənilməsi və tətbiqi, seminarların və mütəxəssislərarası təcrübə mübadiləsinin təşkili, eləcə də gələcəkdə müvafiq istiqamətlərdə birgə layihələrin həyata keçirilməsi imkanlarının əhəmiyyəti vurğulanıb.
