23 oktyabr 2026-cı il tarixində Dövlət İmtahan Mərkəzinin İdarə Heyətinin sədri Məleykə Abbaszadənin rəhbərlik etdiyi nümayəndə heyəti Xankəndi şəhərində Əmək və Əhalinin Sosial Müdafiəsi Nazirliyinin tabeliyində DOST Agentliyinin təşkilatçılığı ilə keçirilən “SOCGOV 2026: Ağıllı idarəetmə üçün rəqəmsal təhlil” beynəlxalq forumunda iştirak edib.
Forum sosial idarəetmə, rəqəmsal transformasiya və innovativ texnoloji həllər sahəsində beynəlxalq əməkdaşlığın genişləndirilməsi, qabaqcıl təcrübələrin mübadiləsi və məlumatlara əsaslanan qərarvermə mexanizmlərinin inkişaf etdirilməsi məqsədi daşıyıb. Tədbirdə dünyanın 10-dan çox ölkəsindən nümayəndələr, beynəlxalq təşkilatların təmsilçiləri, innovasiya və texnologiya sahəsində fəaliyyət göstərən ekspertlər və tədqiqatçılar iştirak ediblər.
Forum Azərbaycan Respublikasının əmək və əhalinin sosial müdafiəsi naziri Anar Əliyevin açılış nitqi ilə başlayıb. Forum çərçivəsində paralel sessiyalar, tərəfdaş təşkilatların xüsusi təqdimatları, eləcə də ASAN xidmət və Qarabağ Universitetinin birgə tədbiri keçirilib.
Forumda DOST Agentliyinin İdarə Heyətinin sədri Fərid Məmmədovun moderatorluğu ilə “İnnovasiya sürət istəyir, dövlət isə qayda – balans necə qurulmalıdır?” mövzusunda panel sessiyası olub. Moldovanın Əmək və Sosial Müdafiə Nazirliyinin dövlət katibi Mihai Qabriel Çiobanu, Yunanıstanın Elektron Milli Sosial Sığorta Fondunun direktoru Aleksandros Varveris Georgios, ASAN Süni İntellekt Mərkəzinin rəhbəri Ləman İbrahimova, Lüksemburq Milli Məlumat Xidmətinin məlumatların idarə edilməsi üzrə mütəxəssisi Nicat Hacıxanov mövzu ilə bağlı fikirlərini bölüşüblər. Tədbir çərçivəsində, həmçinin “Süni intellekt və data əsaslı dövlət idarəçiliyi: imkanlar, risklər və gələcək” mövzusunda panel sessiya keçirilib. Müzakirələrdə süni intellektin dövlət idarəçiliyində tətbiqi, məlumatların keyfiyyəti və təhlükəsizliyi, eləcə də texnoloji innovasiyalarla hüquqi tənzimləmə arasında tarazlığın təmin edilməsi məsələləri diqqət mərkəzində olub.
Forum çərçivəsində rəqəmsal analitika, süni intellektin sosial xidmətlər sahəsində tətbiqi, etik idarəetmə və data əsaslı qərarvermə imkanları müzakirə olunub. Yerli və beynəlxalq ekspertlərin iştirakı ilə təşkil edilən tematik müzakirələr və TEDx formatında debatlarda innovativ texnologiyaların dövlət-vətəndaş münasibətlərinin inkişafında rolu, sosial xidmətlərin daha əlçatan, çevik və şəffaf idarəetmə modelləri əsasında təşkili məsələlərinə diqqət yetirilib.
Forum zamanı sosial sahədə süni intellekt əsaslı innovativ həlləri təşviq edən “AI4DOST Social Award 2026” beynəlxalq müsabiqəsinin mükafatlandırma mərasimi keçirilib. Müsabiqəyə təqdim olunan 84 layihədən (52 milli və 32 beynəlxalq) finala yüksələn 20 layihə arasından seçilmiş 7 qalib müxtəlif nominasiyalar üzrə, o cümlədən ilin gənc sosial innovatoru və sosial transformasiya lideri istiqamətlərində mükafatlandırılıb.
“SOCGOV 2026” beynəlxalq forumu rəqəmsal texnologiyaların sosial idarəetmədə tətbiqi, süni intellekt əsaslı həllərin təşviqi və qabaqcıl beynəlxalq təcrübələrin mübadiləsi baxımından əhəmiyyətli platforma kimi çıxış edib.
