Dövlət İmtahan Mərkəzinin Naxçıvan MR regional bölməsi imtahanlara zal nəzarətçisi kimi cəlb ediləcək nəzarətçilərlə keçirilən seminarlara yekun vurmuşdur. Seminarlar qrafik üzrə yanvar ayının 10 – dan 17 – dək davam etmişdir. Muxtar respublikanın bütün şəhər və rayonlarında keçirilən seminarlarda Naxçıvan şəhəri üzrə 59, Şərur rayonu üzrə 40, Babək rayonu üzrə 37, Ordubad rayonu üzrə 22, Culfa rayonu üzrə 21, Şahbuz rayonu üzrə 9, Kəngərli rayonu üzrə 11, Sədərək rayonu üzrə isə 9 nəzarətçi iştirak etmişdir. Muxtar respublika üzrə 3 nəfər üzrlü səbəbdən iştirak etməmişdir.
Seminarlar DİM – in Naxçıvan MR regional bölməsinin əməkdaşları tərəfindən keçirilmişdir.
Seminarlarda nəzarətçilərə imtahan qaydaları izah edilmiş, rast gəlinən hallar təhlil edilmişdir. Nəzarətçilərin imtahan prosesi ilə əyani surətdə tanış olması məqsədilə əyani vəsaitlərdən istifadə edilmiş, imtahan texnologiyasına aid film nümayiş etdirilmişdir. Seminarlarda nəzarətçi-müəllimlərin sualları cavablandırılmış, şəxsi anket məlumatları dəqiqləşdirilmişdir.
