22-25 sentyabr 2024-cü il tarixlərində ABŞ-nin Pensilvaniya ştatında yerləşən Filadelfiya şəhərində Təhsilin Qiymətləndirilməsi üzrə Beynəlxalq Assosiasiyanın (IAEA) 49-cu illik konfransı keçirilir.
“Süni intellekt təhsilin qiymətləndirilməsinin təkmilləşməsinə necə kömək edə bilər?” mövzusunda təşkil olunan konfransda Dövlət İmtahan Mərkəzinin (DİM) Texnoloji nəzarət və imtahan materiallarının avtomatlaşdırılmış çapı şöbəsinin müdiri Tural Mustafayev, Beynəlxalq əməkdaşlıq şöbəsinin müdiri Elmir Şirinov, Dövlət dili və xarici dillər üzrə şöbənin müdiri Könül Hacıyeva və həmin şöbənin aparıcı məsləhətçisi İlahə Nəbizadə iştirak edirlər.
Konfransın əsas məruzəçilərindən olan Kambium Qiymətləndirmənin təbii dil tətbiqləri üzrə baş alimi S.Lottric, London Universitet Kollecinin (UCL) təhsil qiymətləndirilməsi üzrə əməkdar professoru D.Viliam, Təhsil Qiymətləndirmə Xidmətinin (ETS) Tədqiqat İnstitutunda qiymətləndirmədə süni intellekt proqramının baş tədqiqat direktoru M.S.Conson və digərləri qiymətləndirmədə süni intellektin praktik istifadəsi, bu sahədəki çətinliklər və onların həll yolları, süni intellekt vasitəsilə qiymətləndirmənin effektivliyinin artırılması kimi mövzular haqqında danışacaqlar.
DİM-in əməkdaşları 22 sentyabr 2024-cü il tarixində konfrans çərçivəsində keçirilmiş “Formativ qiymətləndirmə bacarıqlarının təkmilləşdirilməsi: İnkişaf etməkdə olan ölkələrin təhsilinə təsirləri”, “Genişmiqyaslı qiymətləndirmələrdə tələbə və qrup davranışlarını anlamaq və öyrənmək üçün metodologiyalarda yeniliklər” və “Yazı işlərinin qiymətləndirilməsində süni intellektin istifadəsinin ən yaxşı təcrübələri ” adlı seminarlarda iştirak ediblər.
Konfrans müddətində Könül Hacıyeva “İmtahan modelinin namizədlərin ehtiyaclarına uyğunlaşdırılması: hibrid imtahan modelinə doğru kiçik addım”, İlahə Nəbizadə isə “Azərbaycanda tam orta təhsil səviyyəsində ingilis dili üzrə oxu bacarığını yoxlayan test tapşırıqlarının spesifikasiyaları” adlı təqdimatlarla çıxış edəcəklər (konfransın proqramı – https://bit.ly/4ew0szN).
Qeyd edək ki, IAEA 1977-ci ilin aprelində ABŞ-nin Nyu-Cersi ştatının Prinston şəhərində keçirilən beynəlxalq konfransda yaradılıb. Həmin ildən etibarən, təhsildə qiymətləndirmə sahəsində mövcud olan problemlər və onların həll yollarının araşdırılması məqsədilə 50-dən çox ölkədən olan nümayəndələr hər il təşkil olunan konfranslarda bir araya gəlir və müzakirələr aparırlar.
Həmçinin onu da vurğulamaq lazımdır ki, DİM (əvvəlki TQDK-nın fəaliyyəti də daxil olmaqla) 1999-cu ildən IAEA-nın daimi üzvüdür, 2007 və 2019-cu illərdə təşkilatın illik konfranslarına ev sahibliyi etmişdir.
Konfrans haqqında ətraflı məlumatı verilmiş keçiddən əldə etmək mümkündür: http://bit.ly/3ZDhisp
