Təlimlər Bakı şəhəri, Bərdə, Gəncə, Şəmkir regional bölmələri üzrə cəlb olunan namizədlərlə ənənəvi qaydada, Xaçmaz, Şəki, Şirvan, Göyçay, Lənkəran regional bölmələri üzrə isə onlayn rejimdə keçirilib.
Qeyd edək ki, təlimlərdə DİM tərəfindən keçirilən imtahanlar, onların təşkili və idarəedilməsi, zal nəzarətçilərinin və digər şəxslərin vəzifələri və funksiyaları, eləcə də səmərəli ünsiyyət və işgüzar etiket texnikaları, ünsiyyət prosesində stresin idarə olunması, etik davranış qaydaları haqqında məlumatlar verilib.
Növbəti mərhələdə namizədlər yekun test imtahanında iştirak edəcəklər. Yekun test imtahanından məqbul qiymət alan namizədlər zal nəzarətçiləri bazasına qəbul olunaraq imtahanlara dəvət olunacaqlar.
Məlumat üçün bildirək ki, zal nəzarətçisi fəaliyyətinin sertifikatlaşdırılması məqsədilə namizədlərin elektron qeydiyyatı yanvarın 31-də başa çatıb və 945 nəfər qeydiyyatdan keçib. Cari ilin sentyabr ayından etibarən isə sistem yenidən aktiv ediləcəkdir.