9 mart 2023-cü il tarixində DİM-in inzibati binasında ümumilikdə 60 nəfərin iştirak etdiyi “Azərbaycanda maliyyə və mühasibatlıq sahələri üzrə peşəkarlar üçün trendlər’’ mövzusunda tədbir təşkil olunub.
Tədbirdə DİM-in Direktorlar Şurasının sədri Məleykə Abbaszadə, sədr müavini Bəhram Xəlilov, ACCA-in Türkiyə Regional Mərkəzinin (Türkiyə, Azərbaycan və Gürcüstan) biznesin inkişafı üzrə meneceri Ülgen Coşkun Kıymık, Azərbaycan Respublikası Auditorlar Palatası sədrinin müşaviri Fəqan Qarayev, Azərbaycan Respublikası Maliyyə Nazirliyinin Uçot siyasəti şöbəsinin müdiri Firuzə Abdullayeva, ali təhsil müəssisələrinin nümayəndələri, DİM-in struktur bölmə rəhbərləri və eyni zamanda ACCA sertifikatına sahib tələbələr iştirak ediblər.
Görüşün rəsmi hissəsindən əvvəl qonaqlar DİM-də yaradılmış və ölkəmizin milli qiymətləndirmə sisteminin tarixini əks etdirən muzeylə tanış olublar. Onlara milli qiymətləndirmə sisteminin yaradılması və keçdiyi inkişaf yolu barəsində məlumat verilib.
Tədbir Azərbaycan Respublikasının Dövlət Himninin səsləndirilməsi və Vətənimizin bütövlüyü uğrunda həlak olmuş şəhidlərimizin, eyni zamanda Türkiyədə zəlzələ nəticəsində həyatını itirənlərin xatirəsinin bir dəqiqəlik sükutla yad edilməsi ilə başlanıb.
Tədbiri giriş sözü ilə açan DİM-in Direktorlar Şurasının sədri Məleykə Abbaszadə mühasibat uçotu və audit sahəsi üzrə yüksək maliyyə savadlılığına sahib kadrların yetişdirilməsinə töhfə verməyin DİM-in məqsədləri sırasına daxil olduğunu vurğulayıb. Sədr eyni zamanda DİM-in Maliyyə Nazirliyi, peşəkar mühasib təşkilatları, tədris mərkəzləri və ali təhsil müəssisələri ilə əməkdaşlığının mütəxəssislərə sahə üzrə yeniliklər və dəyişikliklərdən zamanında xəbərdar olmağa, eləcə də yenilənən və rəqabətli əmək bazarının tələblərini daim ödəməyə imkan yaradacağını bildirib. O, həmçinin PMS imtahanlarının Beynəlxalq Mühasiblər Federasiyasının (IFAC) standartlarına uyğunlaşdırılması üçün ACCA ilə sıx əməkdaşlığın önəmini qeyd edib.
Tədbirdə çıxış edən Azərbaycan Respublikası Auditorlar Palatası sədrinin müşaviri Fəqan Qarayev gənc nəslin karyera istəklərinin müəyyənləşdirilməsi nəticəsində maliyyə, audit, mühasibatlıq sahələrində kadrların yetişməsinin əhəmiyyətindən danışıb. O, həmçinin ölkədə hesabatlılığın və şəffaflığın təmin edilməsində, korrupsiyaya və kölgə iqtisadiyyatına qarşı mübarizədə, maliyyə resurslarından daha səmərəli istifadə edilməsində və ölkə iqtisadiyyatının investisiya cəlbediciliyinin artırılmasında beynəlxalq standartların tətbiqinin əhəmiyyətindən bəhs edib.
Daha sonra Maliyyə Nazirliyinin Uçot siyasəti şöbəsinin müdiri Firuzə Abdullayeva peşəkar mühasib sertifikatının əldə edilməsi, peşəkar mühasiblər təbəqəsinin yaradılmasının bu sahənin daim inkişaf etdirilməsi üçün nəzərdə tutulduğunu bildirib. O, bu gün peşəkar mühasib sertifikatının əldə edilməsi ilə bağlı imtahanlardan müvəffəqiyyətlə keçən şəxslərin sayının artmasının mühasiblərin həqiqətən də öz üzərində işləməsi, bilik və bacarıqlarının artırılmasının göstəricisi olduğunu diqqətə çatdırıb.
Tədbirdə ACCA-in Türkiyə qolunun biznesin inkişafı üzrə meneceri Ülgen Coşkun Kıymık ACCA-in 2023-cü il Qlobal İstedadlar Trendi üzrə apardığı təqdiqatın nəticələri barədə ətraflı məlumatı auditoriya ilə paylaşıb. Qeyd edək ki, Azərbaycanın da arasında olduğu 148 ölkədən 8405 mühasibin iştirak etdiyi tədqiqatda Azərbaycan iştirakçıların aktivliyinə görə 5-ci yerə çıxıb.
Son olaraq, DİM-in Dövlət qulluğu, peşəkar mühasib və digər sertifikat imtahanları üzrə sektorunun əməkdaşı Emil Əliyev PMS İmtahanları ilə əlaqədar ümumi məlumatlar və statistik göstəricilər barədə tədbir iştirakçılarını məlumatlandırıb.
Tədbir sual-cavab sessiyası ilə yekunlaşıb.
Onu da qeyd edək ki, DİM və ACCA arasında qurulan uğurlu əməkdaşlıq nəticəsində peşəkar mühasib sertifikatının (PMS) ACCA tərəfindən akkreditasiyasının başlanması ilə əlaqədar ilkin razılıq əldə olunub.
