Görüşdə Anlaşma Memorandumunun imzalanmasına dair məmnunluq ifadə edilib və aşağıda qeyd olunan əməkdaşlıq istiqamətləri üzrə əldə olunmuş nəticələr müzakirə edilərək növbəti fəaliyyət planı nəzərdən keçirilib:
1. DİM-in dəstəyi ilə Gürcüstanın tədrisi Azərbaycan dilində olan orta məktəblərində işləyən Azərbaycan dili və ədəbiyyatı müəllimləri üçün “Müəllimlərin peşə ixtisas imtahanı” üzrə qiymətləndirmə alətinə dair test bankının hazırlanması;
2. DİM-in gürcü dili üzrə buraxılış imtahanlarında (9 və 11-ci sinif üzrə) istifadə etdiyi test tapşırıqlarının MQİM tərəfindən ekspertizası;
Qeyd edək ki, DİM-in dəstəyi ilə Gürcüstanın tədrisi Azərbaycan dilində olan orta məktəblərində işləyən Azərbaycan dili və ədəbiyyatı müəllimləri üçün “Müəllimlərin peşə ixtisas imtahanı” üzrə qiymətləndirmə alətinin tətbiqi Azərbaycan dili və ədəbiyyatı müəllimlərinin attestasiyası zamanı differensial əmək haqlarının müəyyən edilməsində istifadə olunacaqdır.
Əməkdaşlığa dair yeni fəaliyyət planında isə aşağıdakı istiqamətlər müəyyən edilib:
- Azərbaycan məktəblərində gürcü dili üzrə qiymətləndirmə alətlərinin hazırlanması üçün MQİM tərəfindən onlayn təlimin təşkili;
- Gürcüstanın tədrisi Azərbaycan dilində olan orta məktəblərində işləyən azərbaycanlı müəllimlər üçün videodərslər, həmçinin təlim nəticələrinin yoxlanılması üçün qiymətləndirmə imkanlarının DİM tərəfindən təmin edilməsi;
- DİM və MQİM ekspertləri tərəfindən hazırlanan müxtəlif sahələrə aid ingilis və ya rus dilində olan yoxlama-ölçmə materiallarının mübadiləsi;
- DİM və MQİM arasında mütəmadi olaraq videokonfransların təşkili və təcrübə mübadiləsinin davam etdirilməsi.
Görüş zamanı, həmçinin pandemiya dövründə keçirilən imtahanların xüsusiyyətləri, hər iki ölkənin bu sahədə təcrübəsi və mövcud həll yolları istiqamətində fikir mübadiləsi aparılıb.
