2019-cu il 10 dekabr tarixində Azərbaycan Turizm Bürosunun tabeliyində fəaliyyət göstərən Azərbaycan Konqreslər Bürosu tərəfindən cari il ərzində Azərbaycana işgüzar tədbirləri cəlb edən yerli qurumların və təşkilatların mükafatlandırma mərasimi keçirilib.
Mərasimdə Azərbaycan Respublikasının Dövlət İmtahan Mərkəzinə 2019-cu il 22-27 sentyabr tarixlərində Bakı şəhərində “Qiymətləndirmə və qərarvermə: fərdi və institusional həll yolları” mövzusunda Təhsilin Qiymətləndirilməsi üzrə Beynəlxalq Assosiasiyasının (IAEA) 45-ci illik konfransının keçirilməsinə görə Dövlət Turizm Agentliyinin sədri Fuad Nağıyev və Azərbaycan Turizm Bürosunun baş icraçı direktoru Florian Zenqstşmid tərəfindən mükafat və sertifikat təqdim olunub.
Tədbirə müxtəlif dövlət qurumlarının, beynəlxalq təşkilatların və İşgüzar Tədbirlər Sənayesinin nümayəndələri qatılıblar.
Tədbir çərçivəsində Azərbaycan Konqreslər Bürosunun bir illik fəaliyyəti barədə hesabat xarakterli məlumat verilib, Azərbaycan Turizm Bürosunun Baş icraçı direktor müavini, Azərbaycan Konqreslər Bürosunun direktoru və bir sıra digər müxtəlif təşkilatların nümayəndələri çıxış ediblər.
Xatırladaq, DİM tərəfindən təşkil olunan “IAEA2019” Konfransına 55-dən çox ölkəni təmsil edən təhsil müəssisələri, tədqiqat mərkəzləri və müvafiq dövlət qurumlarından 300 beynəlxalq və 100 yerli ekspert cəlb olunmuşdur. Azərbaycan Respublikasının Dövlət Turizm Agentliyi konfransın rəsmi tərəfdaşlarından biri idi.