Qonaqlar görüşdən əvvəl DİM-də yaradılan ölkəmizin milli qiymətləndirmə üzrə tarixini əks etdirən muzeylə tanış olublar. İştirakçılara milli qiymətləndirmə sisteminin yaradılması və inkişaf tarixi barədə məlumat verilib. Həmçinin DİM-də hazırlanıb quraşdırılmış və qəbul imtahanları ilə bağlı ölkə üzrə statistik məlumatları əks etdirən Azərbaycan Respublikasının elektron xəritəsi nümayiş etdirilib.
Daha sonra iştirakçılarla görüş başlayıb. Tədbirdə ilk olaraq Azərbaycan Respublikasının dövlət himni səsləndirilib və ölkəmizin ərazi bütövlüyü uğrunda həlak olmuş şəhidlərimizin xatirəsi bir dəqiqəlik sükutla yad edilib.
Tədbirdə DİM-in Direktorlar Şurasının sədri Məleykə Abbaszadə, sədr müavinləri Namiq Babayev və Bəhram Xəlilov, Azərbaycan Dövlət İqtisad Universitetinin rektoru Ədalət Muradov, Azərbaycan Memarlıq və İnşaat Universitetinin rektoru Gülçöhrə Məmmədova, Azərbaycan Dillər Universitetinin prorektoru Novruz Məmmədov, Bakı Musiqi Akademiyasının rektoru Fərhad Bədəlbəyli, Azərbaycan Turizm və Menecment Universitetinin rektoru İlham Mədətov, Azərbaycan Milli Konservatoriyasının rektoru Siyavuş Kərimi, Bakı Ali Neft Məktəbinin rektoru Elmar Qasımov, Azərbaycan İlahiyyat İnstitutunun rektoru Aqil Şirinov və DİM-in struktur bölmələrinin rəhbərləri iştirak ediblər.
Görüşdə çıxış edən DİM-in Direktorlar Şurasının sədri M.Abbaszadə ölkəmizdə təhsildə qiymətləndirmə sisteminin daha da inkişafına nail olmaq üçün çoxtərəfli müzakirələrin böyük əhəmiyyət kəsb etdiyini və təhsilalanlar üçün keyfiyyətli təhsil mühitinin yaradılmasında ali təhsil müəssisələrinin aparıcı rolunu qeyd edib. M.Abbaszadə bildirib ki, “28 ildir ki, Azərbaycanda keçirilən qəbul imtahanlarının nəticələri təhlil edilir və iştirakçıların göstəriciləri daimi olaraq izlənilir. Biz ümumi tendensiyanı görə bilirik. Hazırda Dövlət İmtahan Mərkəzinin məlumat bazasında imtahan nəticələri, inkişafın ümumi dinamikası, aparılan çoxsaylı statistik təhlillərlə bağlı elmi materiallar formalaşıb və ali təhsil müəssisələri öz qəbul strategiyalarının müəyyən edilməsində, təlim-tədris prosesinin qurulmasında, əmək bazarının təhlilində bu məlumatlardan istifadə edə bilərlər”. M.Abbaszadə, həmçinin “Yeniliklərin yayılması nəzəriyyəsi”, təhsil sistemində innovasiyaların paylanılmasında insanların rolu, istedadın təbiəti haqqında təqdimatla çıxış edib.
Tədbirdə tərəflər arasında qarşılıqlı əməkdaşlıq imkanları, qiymətləndirmə sahəsində yeni mexanizm və alətlərin yaradılması kimi məsələlər də müzakirə edilib. Həmçinin, DİM tərəfindən ali təhsil müəssisələri ilə əməkdaşlıq sahələri üzrə hazırlanan təkliflər rektorlara təqdim edilib.
Daha sonra Dövlət İmtahan Mərkəzinin əməkdaşları Mərkəz tərəfindən göstərilən aşağıdakı xidmətlər barədə təqdimatlar nümayiş etdiriblər.
- Ən yaxşı beynəlxalq və yerli təcrübə əsasında tədris prosesinin təşkilinə dəstək;
- Qiymətləndirmə alətlərinin hazırlanmasına dəstək;
- Ali təhsil müəssisələrində kompüter əsaslı qiymətləndirməyə keçidə dəstək;
- Elektronlaşma – rəqəmsal platformaların tətbiqi;
- Verilənlər əsasında qərarların qəbul edilməsinə dəstək;
- Tələbələrə təcrübi və psixoloji dəstək;
- DİM-in və ali təhsil müəssisələrinin fəaliyyət istiqamətləri və əməkdaşlığı üzrə təbliğatın aparılması.
Təqdimatlardan sonra əməkdaşlıq imkanlarının genişləndirilməsi üçün müzakirələrin davam etdirilməsinin vacibliyi qeyd olunub və bir sıra təkliflər irəli sürülüb.
Məlumat üçün bildirək ki, bu görüş ali təhsil müəssisələrinin rektorları ilə keçirilən ikinci tədbirdir. Dekabrın 7-də bir qrup ali təhsil müəssisələrinin rektorları ilə iclas keçirilib. Görüşlərin digər ali təhsil müəssisələrinin rəhbərləri ilə də keçirilməsi nəzərdə tutulur.