Dövlət İmtahan Mərkəzinin (DİM) Strateji inkişaf şöbəsinin müdiri Vəli Hüseyn 2020-ci il 21-22 yanvar tarixlərində Pearson təşkilatı tərəfindən Böyük Britaniyanın London şəhərində Pearson Edexcel Qiymətləndirmə Konfransında iştirak etmişdir.
Konfransın keçirilməsində əsas məqsəd qiymətləndirmə sahəsində texnologiyaların istifadəsi üzrə ən son yenilikləri, onların praktiki tətbiqi və mövcud nəticələrini Pearson təşkilatının müxtəlif tərəfdaş ölkələrdən olan nümayəndələri ilə paylaşmaq və fikir mübadiləsi aparmaq olub.
Tədbirdə Pearson akademik ingilis dili (Pearson Test of English Academic, PTE-A) testinin digər ingilis dili üzrə testlərlə müqayisəsi, Pearson təşkilatı tərəfindən testlərin tərtib edilməsi, onların validliyi və etibarlılığı kimi mövzuları əhatə edən təqdimatlar nümayiş etdirilib. Konfransda, həmçinin PTE-A və beynəlxalq GCSE nəticələrinin tanınması, sahənin tələbləri, beynəlxalq məktəblərdən gözləntilər, şagirdlərin və müəllimlərin imtahan gərginliyinin azaldılmasına xidmət edən resurslar təqdim olunub.
Xatırladaq ki, DİM 2018-ci ildən etibarən Pearson təşkilatına aid olan “Pearson VUE”nin rəsmi kompüter əsaslı test mərkəzi olaraq beynəlxalq sertifikat təqdim edən ingilis dili üzrə “Pearson Test of English Academic - PTE Academic”, həmçinin müxtəlif sahələrə aid (İT, maliyyə, mühasibat, menecment, tibb və s.) 100-ə yaxın imtahan keçirir. Bu imtahanlar haqqında əlavə məlumat verilmiş keçiddə təqdim olunur.