Bu gün Azərbaycanda mövcud olan ictimai-siyasi sabitlik respublikamızın müstəqillik tarixinin ən mühüm nailiyyətlərindən biridir. Cənab Prezident İlham Əliyevin rəhbərliyi altında aparılan davamlı islahatların nəticəsində əldə edilən sabitliyin təmin olunmasında Azərbaycan polisinin əvəzsiz rolu vardır.
Asayişin və təhlükəsizliyin mühafizəsi, sabitliyin və əmin-amanlığın qorunması, cinayətkarlıqla mübarizə kimi məsuliyyətli vəzifələri vicdanla yerinə yetirən Azərbaycan polisi xalqımızın güvən yerinə çevrilmişdir. Ulu öndər Heydər Əliyevin ifadəsində qeyd etdiyi kimi “Polis Azərbaycan dövlətinin, xalqının keşiyində duran mübariz bir orqandır.”
Dövlət İmtahan Mərkəzi tərəfindən ölkəmizdə dövlət qulluğu üçün kadrların seçilməsi, ali və orta ixtisas təhsili müəssisələrinə tələbə qəbulunun həyata keçirilməsi və digər sahələr üzrə təşkil edilən kütləvi imtahanlarda polis əməkdaşları imtahan binalarının mühafizəsinin təmin olunmasında, asayişin qorunmasında, binalara buraxılışın təşkilində, imtahanların təhlükəsiz şəraitdə keçirilməsində yüksək peşəkarlıq nümayiş etdirərək vəzifə borcunu layiqincə yerinə yetirirlər.
Dövlət İmtahan Mərkəzinin kollektivi adından daxili işlər orqanlarının bütün şəxsi heyətini 2 iyul “Polis işçilərinin peşə bayramı” günü münasibətilə səmimi qəlbdən təbrik edir, bu çətin, məsuliyyətli, eyni zamanda şərəfli işlərində müvəffəqiyyət arzu edirik.