26 noyabr 2024-cü il tarixində Dövlət İmtahan Mərkəzinin təşəbbüsü ilə ümumi təhsil müəssisələrinin xarici dil fənnini tədris edən bir qrup müəllimi ilə görüş keçirilib.
Görüşdə Dövlət İmtahan Mərkəzinin Yoxlama-ölçmə materiallarının işlənməsi departamentinin müdiri Natiq Əliyev, Metodika və dərsliklərin monitorinqi şöbəsinin müdiri Afiqə Batıyeva, Dövlət dili və xarici dillər üzrə şöbəsinin müdiri Könül Hacıyeva və Markerlərin fəaliyyətinin təhlili üzrə sektorun müdiri Əli Mahmudov iştirak edib.
Tədbiri giriş sözü ilə açan A.Batıyeva görüşün əsas məqsədinin fənn proqramları və yeni tipli test tapşırığı nümunələrininin pedaqoji heyətə təqdim edilməsi olduğunu bildirib. O, yeni qiymətləndirmə modelini və xarici dillərin tədrisinə qoyulan müasir tələbləri nəzərə alaraq, Mərkəzdə xarici dillər üzrə ümumi və tam orta təhsil səviyyələri üzrə buraxılış imtahanlarında tətbiq olunan yoxlama-ölçmə materiallarının hazırlanması, ekspertizası və onların meyarlar əsasında yoxlanılmasına dair hazırlıq kurslarının da fəaliyyəti haqqında geniş məlumat verib.
K.Hacıyeva DİM-in xarici dillərin tədrisinə qoyulan müasir tələbləri nəzərə alaraq bir sıra tədqiqat əsaslı layihə həyata keçirdiyini və statistik araşdırmalar apardığını qeyd edib. O, həmçinin əldə olunan nəticələrə əsasən ümumi və tam orta təhsil səviyyələrində yeni təhsil proqramları üzrə təhsilalanların xarici dillər üzrə biliyinin yekun attestasiyası zamanı xarici dil blokunun dillər üzrə ümum-Avpora tövsiyə çərçivə sənədinin müvafiq səviyyələrinə uyğunlaşdırılmasına zərurət yarandığını və bu gün orta məktəb şagirdlərinin yekun attestasiya nəticələrinin ildən-ilə müsbət istiqamətdə dəyişdiyini və şagirdlər tərəfindən açıq sualların cavablandırılması üzrə faiz göstəricilərinin artması faktlarını vurğulayıb.
Görüşdə iştirak edən xarici dil fənləri üzrə DİM-in işçi qruplarının rəhbərləri fənn proqramlarına edilmiş müvafiq dəyişikliklər barəsində geniş məlumat veriblər.
Daha sonra isə DİM-in əməkdaşı N.Kərimova ümumi orta təhsil səviyyəsi üzrə imtahan modelinə edilmiş dəyişiklik haqqında məlumat verib, həmçinin ilk dəfə ümumi təhsil səviyyəsi üzrə buraxılış imtahanının xarici dil blokunda tətbiq olunacaq üç ardıcıl şəkil əsasında hekayə qurmaq, yəni yazı bacarıqlarını yoxlayan yeni tipli tapşırıq modelini və qiymətləndirmə meyarlarını təqdim edib.
Görüş zamanı 2023-cü ildə Mərkəz tərəfindən keçirilmiş pilot imtahanda iştirak etmiş şagirdlərin yazı nümunələri əsasında iştirakçılar tərəfindən interaktiv formada qiymətləndirmə aparılıb və bu qiymətləndirmə əsasında müzakirələr keçirilib, həmçinin müəllimləri maraqlandıran suallar müvafiq struktur bölmələrin rəhbərləri tərəfindən cavablandırılıb.
