29 noyabr 2024-cü il tarixində Azərbaycan Dillər Universitetində tələbə və gənclərin iştirakı ilə “Gənclərin dövlət qulluğu sahəsində biliklərinin artırılması” mövzusunda maarifləndirici tədbiri keçirilib.
Görüşdə 200-dən çox yuxarı kurs tələbəsi iştirak edib.
Tədbir “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın 3.1.9-cu fəaliyyət istiqamətinin 2-ci bəndində və “Azərbaycan Respublikasında dövlət qulluğunun inkişafına dair 2019-2025-ci illər üzrə Strategiya”nın 2023-2025-ci illərdə icrası üzrə Fəaliyyət Planında nəzərdə tutulmuş tədbirlərin icrasının təmin edilməsi, dövlət qulluğunun inkişafı istiqamətində həyata keçirilən tədbirlər barədə gənclərin maarifləndirməsi və onların dövlət qulluğuna marağının artırılması məqsədilə keçirilib.
Tədbirdə Azərbaycan Dillər Universitetinin rektorunun müşaviri Coşqun Dadaşov, Gənclər və İdman Nazirliyinin İnsan resurslarının idarə edilməsi şöbəsinin Dövlət qulluğu sektorunun müdiri Ağahüseyn Hüseynov, Nazirliyin İnsan resurslarının idarə edilməsi şöbəsinin İnsan resursları sektorunun müdiri Şahmar Tağıyev, Dövlət İmtahan Mərkəzinin Dövlət strategiyası ilə iş və insan kapitalının inkişafı şöbəsinin böyük məsləhətçisi Miranə Rüstəmli, tələbə və gənclər iştirak ediblər. Azərbaycan Dillər Universitetinin rektorunun müşaviri Coşqun Dadaşov, maarifləndirmə tədbirinin önəmindən danışaraq qeyd edib ki, bu tədbir gənclərin dövlət qulluğuna marağının artırılmasına və onların uğurlu karyera qurmalarına dəstəkdir. Nazirliyin İnsan resurslarının idarə edilməsi şöbəsinin sektor müdiri Ağahüseyn Hüseynov Nazirliyin aparatında və strukturuna daxil olan qurumlarda dövlət qulluğu vəzifələri və həmin vəzifələrin tutulması şərtləri, yüksək mənəvi və etik dəyərləri əsas tutan, bilik, bacarıq və müsbət şəxsi keyfiyyətləri ilə seçilən gənclərin dövlət qulluğuna qəbulu istiqamətində görülən işlər barədə məlumat verib.
Dövlət İmtahan Mərkəzinin Dövlət strategiyası ilə iş və insan kapitalının inkişafı şöbəsinin böyük məsləhətçisi Miranə Rüstəmli dövlət qulluğuna qəbul mexanizmləri, dövlət qulluğu sisteminin mahiyyəti və əhəmiyyəti, dövlət qulluğu sahəsində elektron xidmətlər, dövlət qulluqçusu anlayışı, dövlət qulluqçusunun əsas vəzifələri və hüquqları, dövlət qulluqçuları üçün təminatlar, qulluqda fəaliyyətin davam etdirilməsi şərtləri, dövlət orqanlarının kadr potensialının inkişaf etdirilməsi istiqamətində görülən işlər haqqında geniş məlumat verib. Nazirliyin İnsan resurslarının idarə edilməsi şöbəsinin sektor müdiri Şahmar Tağıyev gənclərin dövlət qulluğuna marağının artırılmasının gənc nəslin qüvvəsini, bilik və bacarığını dövlət quruculuğuna yönəldilməsində əhəmiyyətini vurğulayıb. Daha sonra tədbirdə tələbə və gəncləri maraqlandıran suallar cavablandırıb.
