6 yanvar 2020-ci il tarixindən etibarən davam edən, Dövlət İmtahan Mərkəzinin ABŞ-ın Azərbaycandakı Səfirliyi ilə əməkdaşlıq çərçivəsində səfirliyin “English Langauge Specialist (ELS)” proqramının xətti ilə təşkil etdiyi “Müəllimlər üçün intensiv peşəkar inkişaf təlimi və konsultasiya” adlı layihənin son mərhələsində 13 və 14 yanvar tarixlərində DİM-in ingilis dili fənni üzrə təşkil etdiyi təlimlərdə təlimçi kimi fəaliyyət göstərən şəxslərə “Təlimçilər üçün təlim” (TOT) keçirilib. Burada DİM ilə gələcəkdə ingilis dili fənni üzrə sualların yazılması və yoxlanılması (marker) istiqamətində əməkdaşlıq edəcək şəxslərlə təlimlərdə keçiləcək mövzular müzakirə edilib, təlim modeli və nümunə tapşırıqlar hazırlanıb.
Layihə çərçivəsində, həmçinin 14 yanvar tarixində DİM-in Yoxlama-ölçmə materiallarının işlənməsi, Metodika və dərsliklərin monitorinqi, Strateji inkişaf, Statistik araşdırmalar, elmi layihələşdirmə və innovasiyalar şöbələrinin əməkdaşları ilə görüş də təşkil edilmişdir. Görüşdə ingilis dili üzrə müxtəlif bacarıqların ölçülməsi üçün hazırlanan sualların validliyi və etibarlılığının yoxlanılması, bu prosesin daha da təkmilləşdirilməsinə dair müzakirə aparılmış, Neytn Kar tərəfindən tövsiyələr səsləndirilib.
Layihə DİM-in Şəki Regional Bölməsində ingilis dili müəllimlərinə təlimin keçirilməsi ilə davam edəcək və qurumun rəhbərliyi ilə hesabat xarakterli görüşlə başa çatacaqdır.
Qeyd edək ki, layihənin I mərhələsi 1-12 aprel 2019-cu il, II mərhələsi isə 30 sentyabr – 11 oktyabr 2019-cu il tarixlərində həyata keçirilib.
Təlim və konsultasiya ingilis dili üzrə mütəxəssis Neytn Kar tərəfindən aparılır. Ph.D Neytn Kar ingilis dilinin əcnəbilər üçün tədrisi (TESOL) üzrə təcrübəli ekspertdir. O, “ingilis dili xarici dil kimi” (EFL) və təhsilin qiymətləndirilməsi sahələrində müəllimlər və təhsil işçiləri üçün peşəkar inkişaf təlimləri həyata keçirir. Ekspertin ingilis dilinin tədrisi və qiymətləndirilməsi ilə bağlı bir sıra elmi işləri çap olunub. Həmçinin Neytn Kar Qazaxıstan, Vyetnam, İndoneziya və Tayvanın ali təhsil müəssisələrində müəllimlərin peşəkar inkişafı ilə bağlı təlim və seminarlar keçirib.