Məlum olduğu kimi, Dövlət İmtahan Mərkəzinin ingilis dili üzrə bacarıqların qiymətləndirilməsi istiqamətində apardığı fəaliyyətə dəstək göstərmək üçün ABŞ-ın Azərbaycandakı Səfirliyi ilə əməkdaşlıq çərçivəsində səfirliyin “English Langauge Specialist (ELS)” proqramının xətti ilə “Müəllimlər üçün intensiv peşəkar inkişaf təlimi və konsultasiya” adlı üç mərhələli layihənin son mərhələsi 6 yanvar 2020-ci il tarixində başlayıb və hazırda davam edir. Ötən günlər ərzində (7 və 8 yanvar tarixlərində) Bakı şəhərində DİM əməkdaşları və DİM-lə əməkdaşlıq edən ingilis dili müəllimləri ilə 9 və 11-ci sinif buraxılış imtahanlarında ingilis dilinin qiymətləndirilməsi üzrə müxtəlif bacarıqların ölçülməsi üçün sualların hazırlanmasında istifadə olunan meyarlar müzarikə edilib, meyarların təkmilləşdirilməsi istiqamətində tövsiyələr hazırlanıb.
Layihə çərçivəsində 9 yanvar tarixinin gündəliyi həm təlim, həm də DİM əməkdaşları ilə konsultasiya xarakterli görüşü əhatə edib. Günün birinci yarısı Bakı şəhərində DİM əməkdaşları və DİM-lə əməkdaşlıq edən ingilis dili müəllimləri ilə magistratura və doktorantura səviyyəsi üzrə də ingilis dilinin qiymətləndirilməsi üçün sualların hazırlanmasında istifadə olunan meyarların təkmilləşdirilməsi istiqamətində tövsiyələr hazırlanıb. Günün ikinci yarısında DİM-in Statistik araşdırmalar, elmi layihələşdirmə və innovasiyalar şöbəsinin əməkdaşları ilə konsultativ görüş keçirilib, məlumatların elmi-statistik təhlili üçün istifadə edilən metodlar və yeni metodların əlavə edilməsinin mümkünlüyü yolları müzakirə edilib.
Layihə DİM-in ingilis dili fənni üzrə təşkil etdiyi təlimlərdə təlimçi kimi fəaliyyət göstərən şəxslərə, eləcə də Gəncə və Şəki regionlarındakı ingilis dili müəllimlərinə təlimin (TOT – təlimçilər üçün təlim) keçirilməsi ilə davam edəcək və qurumun rəhbərliyi ilə hesabat xarakterli görüşlə başa çatacaq.
Qeyd edək ki, layihənin I mərhələsi 1-2 aprel 2019-cu il, II mərhələsi isə 30 sentyabr – 11 oktyabr 2019-cu il tarixlərində həyata keçirilib.
Təlim və konsultasiya ingilis dili üzrə mütəxəssis Neytn Kar tərəfindən aparılır. Ph.D Neytn Kar ingilis dilinin əcnəbilər üçün tədrisi (TESOL) üzrə təcrübəli ekspertdir. O, “ingilis dili xarici dil kimi” (EFL) və təhsilin qiymətləndirilməsi sahələrində müəllimlər və təhsil işçiləri üçün peşəkar inkişaf təlimləri həyata keçirir. Ekspertin ingilis dilinin tədrisi və qiymətləndirilməsi ilə bağlı bir sıra elmi işləri çap olunub. Həmçinin Neytn Kar Qazaxıstan, Vyetnam, İndoneziya və Tayvanın ali təhsil müəssisələrində müəllimlərin peşəkar inkişafı ilə bağlı təlim və seminarlar keçirib.
