Dövlət İmtahan Mərkəzinin ingilis dili üzrə bacarıqların qiymətləndirilməsini təkmilləşdirmək üçün ABŞ-ın Azərbaycandakı Səfirliyi ilə birgə Səfirliyin “İngilis dili mütəxəssisi” (ELS) proqramının xətti ilə təşkil etdiyi “Müəllimlər üçün intensiv peşəkar inkişaf və konsultasiya” layihəsinin son mərhələsi çərçivəsində Bakı Amerika Mərkəzində bu mərkəzlə əməkdaşlıq edən ingilis dili müəllimləri ilə 13 yanvar tarixində layihəyə dair ictimai hesabatlılıq xarakteri daşıyan görüş keçirilmişdir.
Görüşdə DİM-nin Strateji inkişaf şöbəsinin müdiri Vəli Hüseyn qurumun fəaliyyəti, ingilis dili imtahanlarının təşkil edilməsi, sualların yazılması və yoxlanılması işi, “Müəllimlər üçün intensiv peşəkar inkişaf və konsultasiya” layihəsinin məqsədi, əhəmiyyəti və layihədən gözlənilən nəticələrə dair təqdimat etmiş, layihənin təlimçisi Neytn Kar müxtəlif dil bacarıqlarının ölçülməsinin dillər üzrə ümumavropa tövsiyə çərçivə sənədinə (CEFR) uyğunlaşdırılması mövzusunda iştirakçılarla fikir bölgüsü aparmış, oxu, dinləmə bacarıqları, qrammatika və lüğət ehtiyatının qiymətləndirilməsi üçün ölçü meyarları müzakirə edilmiş və tövsiyələr səsləndirilmişdir.
Layihənin I mərhələsi 1-12 aprel 2019-cu il, II mərhələsi isə 30 sentyabr – 11 oktyabr 2019-cu il tarixlərində həyata keçirilmiş, III mərhələ isə 5 yanvar tarixindən etibarən davam etməkdədir.
Təlim və konsultasiya ingilis dili üzrə mütəxəssis Neytn Kar tərəfindən aparılır. Ph.D Neytn Kar ingilis dilinin əcnəbilər üçün tədrisi (TESOL) üzrə təcrübəli ekspertdir. O, “ingilis dili xarici dil kimi” (EFL) və təhsilin qiymətləndirilməsi sahələrində müəllimlər və təhsil işçiləri üçün peşəkar inkişaf təlimləri həyata keçirir. Ekspertin ingilis dilinin tədrisi və qiymətləndirilməsi ilə bağlı bir sıra elmi işləri çap olunmuşdur. Həmçinin Neytn Kar Qazaxıstan, Vyetnam, İndoneziya və Tayvanın ali təhsil müəssisələrində müəllimlərin peşəkar inkişafı ilə bağlı təlim və seminarlar keçmişdir.
