2019-cu il 20 noyabr tarixində Dövlət İmtahan Mərkəzində “Nəzarətçilərin elektron qeydiyyatı” sistemi ilə işləyəcək ümumtəhsil müəssisələri tərəfindən cavabdeh şəxs qismində təyin olunan əlaqələndiricilər üçün treninq keçirilmişdir.
Treninqdə Bakı və Sumqayıt şəhərlərinin, Abşeron rayonunun, həmçinin qeyd olunan şəhərlərdə məskunlaşmış qaçqın və məcburi köçkün rayonlarının ümumtəhsil müəssisələrinin əlaqələndiriciləri iştirak etmişlər. Onlara “Nəzarətçilərin elektron qeydiyyatı” sisteminin strukturu, funksiyaları, sistemlə işləmək qaydaları haqqında, bazaya daxil edilmiş nəzarətçi-müəllimlərin şəxsi və digər zəruri (təhsil səviyyəsi, ixtisası və təhsillə bağlı digər informasiyalar, sosial sığorta və bank rekvizitləri haqqında məlumatlar və s.) məlumatlarının daxil edilməsi və dəqiqləşdirilməsi, yeni nəzarətçilərin qeydiyyatının aparılması və əmək müqavilələrinin bağlanılması qaydaları barədə ətraflı məlumat verilmişdir.
Nəzarətçilərin elektron qeydiyyatı sistemində cari ildən etibarən zal nəzarətçisi sertifikatı alan şəxslər üçün də, şəxsi kabinetlərinin istifadəçi adı və parolundan istifadə etməklə öz məlumatlarını fərdi qaydada təsdiq etmək imkanı yaradılmışdır. Qeyd edək ki, cari ildə 565 namizəd zal nəzarətçisi sertifikatı əldə edərək DİM tərəfindən keçirilən imtahanlarda iştirak etmişdir.
DİM-in regional bölmələrinin əməkdaşları tərəfindən respublikanın digər bölgələrində də bu sistemlə işləyəcək ümumtəhsil müəssisələrinin əlaqələndiriciləri üçün treninqlər keçirilmişdir.
“Nəzarətçilərin elektron qeydiyyatı” sistemi 2019-cu il dekabr ayının 5-dək aktiv olacaq.
Qeyd edək ki, bu sistem ümumtəhsil müəssisələrindən test imtahanlarına cəlb olunan müəllimlərdən ibarət zal nəzarətçiləri bazasının formalaşdırılması işinin sürətləndirilməsi və səmərəliliyinin artırılması məqsədilə yaradılmışdır. Ümumtəhsil müəssisəsi tərəfindən sistemə cavabdeh şəxs qismində təyin olunan əlaqələndirici şəxsi kabinetinin istifadəçi adı və şifri ilə məktəb üzrə zal nəzarətçiləri bazasına daxil olaraq mövcud nəzarətçilər bazasında onların şəxsi və digər zəruri məlumatlarını dəqiqləşdirir, yeni nəzarətçilərin qeydiyyatını aparır və məktəb üzrə ümumi siyahını təsdiq edərək DİM-ə təqdim edir.
