Özbəkistan Respublikasının Nazirlər Kabineti yanında Dövlət Test Mərkəzinin (DTM) nümayəndələrinin Dövlət İmtahan Mərkəzinin (DİM) fəaliyyəti ilə yaxından tanış olması məqsədilə 2-4 dekabr tarixlərində Bakı şəhərinə işgüzar səfəri həyata keçirilməkdədir.
Səfər çərçivəsndə bu gün DİM Direktorlar Şurasının sədri Məleykə Abbaszadə ilə Özbəkistanın Azərbaycandakı səfiri Şerzod Fayziyevin başçılıq etdiyi nümayəndə heyəti arasında görüş keçirilib.
Görüşdə Dövlət İmtahan Mərkəzinin və Özbəkistanın Dövlət Test Mərkəzinin rəhbər şəxsləri, eləcə də səfirliyin əməkdaşları iştirak ediblər.
Görüşdə hər iki ölkənin analoji qurumları arasında əməkdaşlıq perspektivləri müzakirə edilib, qarşılıqlı təcrübə və fikir mübadiləsi aparılıb.
Xatırladaq ki, 3 günlük səfər müddətində hər iki qurumun nümayəndələri tərəfindən struktur bölmələrin fəaliyyət istiqamətlərinə uyğun təqdimatlar ediləcək və real əməkdaşlıq imkanları müzakirə ediləcəkdir.
Qeyd edək ki, Özbəkistan Respublikası Nazirlər Kabinetinin 14 may 1994-cü il tarixli qərarı ilə yaradılmış Özbəkistanın Dövlət Test Mərkəzi ali təhsil müəssisələrində ali təhsilin bakalavriat səviyyəsinə, Dövlət İdarəçilik Akademiyasının magistratura səviyyəsinə, Daşkənd Tibb Akademiyasının hərbi tibb fakültəsinə, Özbəkistan Respublikası Silahlı Qüvvələr Akademiyasına, Bank Maliyyə Akademiyasına tələbə qəbulunu həyata keçirir.