Səfər çərçivəsində dünən (dekabrın 2-də) DTM-in direktorunun müavini Şerzod Batirovun rəhbərliyi ilə Özbəkistan nümayəndə heyətinin üzvləri elektron xidmətlər, imtahanların texnoloji təminatı, məlumat bazalarının yaradılması prosesi haqqında DİM-in İnformasiyalaşdırma və texnoloji təminat şöbəsinin və imtahanların məzmununa dair metodik materialların, dərsliklərin monitorinqi və qiymətləndirilməsi, elmi-metodiki seminarların təşkili, markerlərin hazırlıq prosesi ilə məşğul olan Metodika və dərsliklərin monitorinqi şöbəsinin fəaliyyəti haqqında təqdimatları dinləyiblər.
Daha sonra qonaqlar qapalı şəraitdə sual kitabçalarının çap edilməsi prosesi ilə yaxından tanış olublar. İştirakçılara Sual Kitabçalarının Rəqəmsal Hazırlanması və Auditi Sistemi haqqında məlumat verilib. Qeyd olunub ki, bu sistem hər bir imtahan iştirakçısı üçün tam avtomatlaşdırılmış şəkildə imtahan zalları üzrə paketlənmiş fərdi sual kitabçalarının hazırlanmasına və kitabçanın həmin şəxsin imtahan verəcəyi zalın zərfinə qoyulmasına təminat verir.
Bu gün (dekabrın 3-də) isə nümayəndə heyəti üçün DİM-in Statistik araşdırmalar, elmi layihələşdirmə və innovasiyalar şöbəsi, Yoxlama-ölçmə materiallarının işlənməsi şöbəsi və Təşkilat şöbəsinin əməkdaşları tərəfindən müvafiq olaraq imtahan nəticələrinin elmi-statistik analizi, yazı işlərinin qiymətləndirilməsi texnologiyası, qiymətləndirmə prosesinin mərhələləri, markerlərin və qiymətləndirmə meyarlarının hazırlanması, ali təhsil müəssisələrinin müxtəlif səviyyələrinə qəbul olunmaq üçün yoxlama-ölçmə materiallarının hazırlanması, imtahanların təşkili ilə əlaqədar aparılan hazırlıq işləri və digər məsələlər haqqında təqdimatlar edilib.
Dekabrın 4-ü səfərin sonuncu günündə DİM-in dövlət qulluğu fəaliyyəti ilə əlaqədar təqdimat və müzakirələr aparılıb. Təqdimatda dövlət qulluğuna qəbul, məlumat bazalarının yaradılması, “Şagird-məzun”, “Tələbə-məzun”, “Dövlət qulluqçularının reyestri” dövlət elektron məlumat sistemləri haqqında ətraflı məlumat verilib.
Bundan sonra isə 3 günlük səfərin yekunları ilə əlaqədar dəyirmi masa təşkil olunub və hər iki ölkənin analoji qurumları arasında qeyd olunan istiqamətlərdə aparılan işlərin oxşar və fərqli cəhətləri müzakirə olunub. Tərəflər gələcəkdə prioritet əməkdaşlıq istiqamətlərini müəyyən ediblər.
Qeyd edək ki, Özbəkistan Respublikası Nazirlər Kabinetinin 14 may 1994-cü il tarixli qərarı ilə yaradılmış Özbəkistanın Dövlət Test Mərkəzi ali təhsil müəssisələrində ali təhsilin bakalavriat səviyyəsinə, Dövlət İdarəçilik Akademiyasının magistratura səviyyəsinə, Daşkənd Tibb Akademiyasının hərbi tibb fakültəsinə, Özbəkistan Respublikası Silahlı Qüvvələr Akademiyasına, Bank Maliyyə Akademiyasına tələbə qəbulunu həyata keçirir.