Dövlət İmtahan Mərkəzinin təşəbbüsü və Abşeron-Xızı Regional Təhsil İdarəsinin dəstəyi ilə iyunun 3-də Sumqayıt şəhəri 7 nömrəli tam orta məktəbdə 200-dən çox xarici dil müəllimi ilə 2027-ci ildə xarici dil fənləri üzrə tətbiq olunacaq imtahan modeli ilə bağlı maarifləndirici görüş keçirilib.
Tədbirdə çıxış edən məktəbin direktoru Nuranə Hümbətbəyova iştirakçıları salamlayaraq bu cür görüşlərin müəllimlərin yeni qiymətləndirmə yanaşmaları ilə yaxından tanış olması baxımından əhəmiyyətini vurğulayıb. O, xarici dil fənləri üzrə tətbiq edilən yeniliklərin tədris prosesinə müsbət təsir göstərəcəyini və müəllimlər üçün metodik baxımdan faydalı olacağını qeyd edib.
Görüşdə Dövlət İmtahan Mərkəzinin Dövlət dili və xarici dillər şöbəsinin müdiri Könül Hacıyeva xarici dil fənləri üzrə qiymətləndirmə sistemində aparılan dəyişikliklər, yeni imtahan modelinin əsas xüsusiyyətləri, tətbiq edilən yanaşmalar və ölçmə meyarları barədə ətraflı məlumat verib. Bildirilib ki, yenilənmiş imtahan modelinin əsas məqsədi şagirdlərin dil bacarıqlarını daha real, kommunikativ və praktik kontekstdə qiymətləndirməkdir.
Tədbirdə xüsusi olaraq yeni modeldə nəzərdə tutulan yazı tapşırığına diqqət yetirilib və qeyd olunub ki, bu tapşırıq şagirdlərin fikirlərini ardıcıl və məntiqi şəkildə ifadə etmək, mövzuya uyğun mətn qurmaq, lüğət və qrammatik vasitələrdən düzgün istifadə etmək bacarıqlarının daha obyektiv qiymətləndirilməsinə imkan verəcək. Eyni zamanda bu yenilik tədris prosesində yazı bacarıqlarının inkişafına daha sistemli yanaşmanı zəruri edir.
Görüş zamanı Abşeron-Xızı iqtisadi rayonu üzrə xarici dil fənnindən 2024–2025 və 2025–2026-cı tədris illərinə aid statistik göstəricilər də iştirakçıların diqqətinə çatdırılıb. Nəticələr ölkə üzrə orta statistik göstəricilərlə müqayisəli şəkildə təhlil edilərək müəllimlərin diqqətinə çatdırılıb. Müqayisə zamanı Abşeron-Xızı iqtisadi rayonu üzrə bəzi istiqamətlərdə müsbət dinamikanın müşahidə olunduğu, bəzi tapşırıq növləri üzrə isə əlavə metodik işə ehtiyac olduğu vurğulanıb. Xüsusilə açıq-yazılı tapşırıqların nəticələri yeni imtahan modelinə hazırlıq baxımından müəllimlərin bu sahəyə daha çox diqqət ayırmasının vacibliyini göstərir.
Daha sonra DİM-in fənn kuratorları Murad Muradov alman dili, Fatma Ağayeva fransız dili, Gülayə Cavadova ingilis dili, Xalidə Babaşova isə rus dili üzrə yeni imtahan modelində nəzərdə tutulan dəyişiklikləri iştirakçılara ətraflı izah edərək, 100 sözdən ibarət yazılı tapşırığın mahiyyətini, qiymətləndirmə meyarlarını və nümunə cavabları iştirakçılara təqdim ediblər.
Seminar zamanı müəllimlərlə praktiki müzakirələr aparılıb, yazı tapşırığının qiymətləndirilməsi ilə bağlı metodiki tövsiyələr verilib. Tədbirin sonunda müəllimləri maraqlandıran suallar cavablandırılıb, yeni imtahan modeli ilə bağlı fikir mübadiləsi aparılıb.
