15 iyul 2026-cı il tarixində Türk Dövlətləri Təşkilatına üzv ölkələrin imtahan mərkəzləri rəhbər heyəti arasında təhsildə qiymətləndirmə və imtahanların təşkili sahəsində əməkdaşlığın gücləndirilməsi haqqında tərəflər arasında bu ilin 10 aprel tarixində imzalanmış Niyyət Protokolunda müəyyən edilmiş məsələlərin müzakirəsi məqsədilə koordinasiya görüşü keçirilib.
Onlyan formada keçirilən görüşdə Qazaxıstan Respublikasının Elm və Ali Təhsil Nazirliyi yanında Milli Test Mərkəzinin direktoru N.A.Bayjanov, Qırğız Respublikasının Təhsil Nazirliyi yanında Təhsilin Keyfiyyətinin İnkişafı Departamentinin direktoru B.S.Shamshidinova, Türkiyə Respublikasının Ölçmə, Seçmə və Yerləşdirmə Mərkəzinin (ÖSYM) sədri B.A.Ersoy, eləcə də Özbəkistan Respublikasının Ali Təhsil, Elm və İnnovasiyalar Nazirliyi yanında Bilik və Kvalifikasiyaların Qiymətləndirilməsi Agentliyinin şöbə müdiri J.Nurmatov iştirak ediblər.
İlk olaraq Dövlət İmtahan Mərkəzinin İdarə Heyətinin sədri Məleykə Abbaszadə çıxış edərək Türk Dövlətləri Təşkilatı çərçivəsində qiymətləndirmə və imtahan sistemləri sahəsində formalaşdırılan əməkdaşlıq çərçivəsində üzv dövlətlər arasında qarşılıqlı etimadın möhkəmləndirilməsi, qabaqcıl təcrübələrin paylaşılması, innovativ yanaşmaların tətbiqi və insan kapitalının inkişafına töhfə verəcək birgə təşəbbüslərin həyata keçirilməsinin əhəmiyyəti barədə danışıb.
Görüş zamanı tərəflər arasında Niyyət Protokolunda müəyyən edilmiş prioritet istiqamətlər üzrə geniş fikir mübadiləsi aparılıb. Müzakirələr çərçivəsində imtahan sistemlərinin rəqəmsallaşdırılması, müasir qiymətləndirmə platformalarının inkişafı, süni intellekt və digər innovativ texnologiyalar vasitəsilə test tapşırıqlarının hazırlanması, imtahanların təşkili və nəticələrin qiymətləndirilməsi proseslərinə süni intellektin inteqrasiyası istiqamətində mövcud imkanlar nəzərdən keçirilib. Eyni zamanda, imtahanların ədalətliliyi, etibarlılığı və şəffaflığının daha da artırılması məqsədilə birgə elmi tədqiqatların təşviqi, metodoloji yanaşmaların uyğunlaşdırılması və qarşılıqlı etimadın möhkəmləndirilməsi, həmçinin türk dillərinin təşviqi və beynəlxalq səviyyədə tanınmasına xidmət edən, elmi prinsiplərə və qabaqcıl beynəlxalq təcrübəyə əsaslanan etibarlı dil qiymətləndirmə alətlərinin hazırlanması istiqamətində əməkdaşlığın perspektivləri müzakirə edilib.
