13 iyun 2025-ci il tarixində Dövlət İmtahan Mərkəzinin Dövlət dili və xarici dillər üzrə şöbəsinin müdiri Könül Hacıyeva Böyük Britaniyada Kembric Universitetinin Nəşriyyat və Qiymətləndirmə Mərkəzinə (Cambridge University Press & Assessment) işgüzar səfər edib.
Səfərin əsas məqsədi DİM-in təhsilin müxtəlif səviyyələrinə aid xarici dillər üzrə həyata keçirdiyi imtahanların keyfiyyətinin yüksəldilməsi məqsədilə tapşırıqların hazırlanmasına cəlb olunan ekspertlərin təlimi, yazı işlərinin qiymətləndirilməsi meyarlarının təkmilləşdirilməsi, beynəlxalq standartlara uyğun qiymətləndirmə modellərinin tətbiqi və iki mərkəz arasında əməkdaşlıq əlaqələrinin gücləndirilməsi olub.
Səfər çərçivəsində təşkil olunan görüşlərdə Kembric Universitetinin Nəşriyyat və Qiymətləndirmə Mərkəzinin rəhbərliyi, o cümlədən təhsil islahatları, çoxsəviyyəli testlər, yazı bacarıqlarının qiymətləndirilməsi, onlayn adaptiv imtahan texnologiyaları üzrə məsul mütəxəssislər də iştirak ediblər.
Görüşlərdə dil bacarıqlarının qiymətləndirilməsi sahəsindəki beynəlxalq təcrübə, qiymətləndirmə üzrə mütəxəssis və markerlərin peşəkar təlimlərə cəlb edilməsi, situativ mühakimə tipli test tapşırıqlarının tətbiqi imkanları, onlayn adaptiv imtahanların inkişaf etdirilməsi və s. məsələlər müzakirə olunub.
Müzakirələr zamanı DİM-in xarici dillər üzrə bacarıqların qiymətləndirilməsi istiqamətindəki təcrübəsi və innovativ yanaşmaları yüksək maraqla qarşılanıb və əməkdaşlıq üçün geniş imkanlar açılıb. Görüşlərdə həmçinin imtahanların təhlükəsizliyinin gücləndirilməsi, rəqəmsal texnologiyaların tətbiqi və real həyati bacarıqların qiymətləndirilməsi sahəsində qabaqcıl təcrübələrlə bağlı fikir mübadiləsi aparılıb.
Tərəflər gələcəkdə birgə təlim proqramlarının təşkili, ekspert mübadiləsi və yeni qiymətləndirmə metodlarının hazırlanması istiqamətində əməkdaşlığın genişləndirilməsi barədə razılıq əldə ediblər.
