SAT (Scholastic Aptitude/Assessment Test) müxtəlif siniflərdə təhsil alan məktəb şagirdlərinin oxuma, yazma və riyazi bilik və bacarıqları yoxlayan standartlaşdırılmış, yararlılıq müddəti 5 il olan test imtahanlarıdır və hər il imtahanda iki milyondan artıq şəxs iştirak edir.
SAT imtahanının nəticəsi beynəlxalq səviyyədə tanınmaqla, ABŞ-da və dünyanın müxtəlif ölkələrində kollec və universitetlərə qəbul prosesində məktəb məzunlarının ali təhsil almağa hazırlığını qiymətləndirməyə imkan verən obyektiv imtahan göstəricisi kimi qəbul olunur. Ali təhsil ocaqlarının qəbul komissiyaları üçün SAT imtahanının nəticəsi müraciət edən məktəb məzunlarını eyni şkala üzrə müqayisə etməyə imkan verir, həmçinin onlara təqaüd verilməsi qərarlarını müəyyən etməkdə obyektiv mənbə hesab olunur.
2014-cü ilin sonunda ABŞ-ın ETS (Educational Testing Service - Təhsil Qiymətləndirmə Xidməti) təşkilatının dəstəyi ilə “College Board”- Ali təhsilə qəbul Şurası tərəfindən hazırlanan SAT imtahanlarının keçirilməsi üçün DİM-in test mərkəzi kimi fəaliyyət göstərməsi barədə razılıq əldə edilmişdir.
SAT imtahanının ödənişi 111 ABŞ dollarıdır. İmtahan rüsumlarının ətraflı bölgüsü linkdə: https://sat.collegeboard.org/register/intl-services-fees
SAT imtahanının nəticələri bir qayda olaraq (istisnalar olmaq şərtilə) imtahan günündən 7-14 gün sonra imtahan verənlərin “College Board”-un internet səhifəsindəki şəxsi hesabında açıqlanır.
Ünvan:
Rəqəmsal SAT imtahanı DİM-in fəaliyyət göstərdiyi hər iki ünvanında təşkil olunur.
- Akademik Həsən Əliyev küçəsi, 299 (TC60129)
- Süleyman Sani Axundov küçəsi, 50 (TC56582)
Notbuk/planşet:
İştirakçılar imtahan günündən öncə SAT imtahanı üçün xüsusi hazırlanmış proqram təminatını öz notbuk və ya planşetlərinə yükləməlidirlər.
İmtahan iştirakçısının özünün notbuk və ya planşeti yoxdursa, o, “College Board”a imtahan üçün notbuk/planşetlə müvəqqəti təmin edilməsi barədə sorğu göndərə bilər. Notbuk və ya planşet ancaq imtahandan əvvəl “College Board”a sorğu göndərmiş iştirakçılara Mərkəzdə imtahan günü veriləcəkdir. İmtahan iştirakçısının notbuk və ya planşetini imtahan mərkəzinə gətirmək imkanı yoxdursa və o, “College Board”dan notbuk/planşet sorğu edilməsi prosesindən keçməyibsə, həmin iştirakçı imtahan mərkəzinə buraxılmayacaq.
İmtahan müddəti:
Rəqəmsal SAT 2 saat və aralarında 10 dəqiqəlik fasilə olmaqla iki bölmədən (Oxu, yazı və Riyaziyyat) ibarətdir.
Proqram təminatı:
İmtahanın proqram təminatı imtahan iştirakçıları üçün aşağıdakı funksionallığı təmin edir:
Suallara daha sonra qayıtmaq üçün onları işarələmək seçimi;
İştirakçıların imtahan ekranının yuxarısında göstərmək və ya gizlətmək üçün seçə biləcəyi geriyə irəliləyən vaxt;
İştirakçıların riyaziyyat bölməsində istifadə etmələri üçün quraşdırılmış qrafik kalkulyator (iştirakçılar öz kalkulyatorlarını da imtahana gətirə bilərlər);
Hər bir riyaziyyat sualı üçün ümumi düsturlardan ibarət istinad vərəqi.
Proqram təminatının interfeysi və sınaq imtahanı:
Rəqəmsal SAT imtahanının proqram təminatının interfeysi və ona uyğun imtahan suallarını “College Board”un rəsmi saytından yükləyərək tanış olmaq mümkündür.
İştirakçılar imtahana nə gətirilməlidirlər?
İmtahanda iştirak edən şəxslər tələb olunan aşağıdakı vasitələrlə birlikdə imtahan binasında olmalıdırlar:
1. Şəkilli şəxsiyyət vəsiqəsi və ya ümumvətəndaş pasportu;
2. Buraxılış vərəqəsi – “Admission Ticket”;
3. “College Board”un tələblərinə cavab verən notbuk və ya planşet (adapter ilə birgə).
Qeyd olunan sənədlərdən biri olmadıqda və ya sənədlər arasında uyğunsuzluq olduqda iştirakçı test mərkəzinə buraxılmır. İştirakçılar imtahana, həmçinin kalkulyator, qeydləri aparmaq üçün qələm və ya karandaş və digər əşyaları gətirə bilərlər. Qaralama üçün vərəq imtahan mərkəzində verilir.
Tarix və ətraflı məlumat:
2026-cı ildə SAT imtahanlarının DİM test mərkəzi tərəfindən aşağıdakı tarixlərdə keçirilməsi nəzərdə tutulur:
14 mart
2 may
6 iyun
15 avqust
12 sentyabr
3 oktyabr
7 noyabr
5 dekabr
Rəqəmsal SAT imtahanı barədə daha ətraflı məlumat “College Board”un rəsmi internet səhifəsində mövcuddur: https://satsuite.collegeboard.org/digital
DİM tərəfindən keçirilən SAT imtahanına qeydiyyat, imtahanın keçirilməsi qaydaları və nəticələrin öyrənilməsi haqqında əlavə məlumat əldə etmək üçün aşağıdakı elektron ünvana müraciət edə bilərsiniz: international@dim.gov.az
ADA Universitetinə qəbul
“ADA” Universitetinin bakalavriat səviyyəsinə qəbul iki yolla aparılır:
1. DİM-in keçirdiyi qəbul imtahanlarının nəticələri vasitəsilə;
2. Beynəlxalq SAT imtahanı nəticəsi vasitəsilə.
SAT imtahanının nəticəsi ilə müraciət edənlər üçün müəyyən olunmuş tələblər:
ADA Universitetinin ixtisaslarının müsabiqəsinə beynəlxalq SAT imtahanı üzrə ən azı 1200 bal toplayan, həmçinin ya IELTS Academic üzrə minimum 6.0, ya TOEFL IBT üzrə minimum 75 (yeni şkala ilə 4), ya Duolingo English Test üzrə minimum 105 və ya PTE üzrə minimum 50 balı olan abituriyentlər də buraxılacaqlar. İngilis dili ilə bağlı tələb Azərbaycandan kənarda yerləşən ingilis dilli məktəblərin məzunlarına və ya ADA Universitetinin ingilis dili kurslarının müvafiq səviyyəsini müvəffəqiyyətlə bitirmiş abituriyentlərə şamil olunmur. “Kompüter elmləri”, “Kompüter mühəndisliyi”, “Elektrik və elektronika mühəndisliyi”, “İnformasiya texnologiyaları”, “Riyaziyyat”, “Biznesin idarə edilməsi”, “İqtisadiyyat” və “Maliyyə” ixtisaslarına qəbul olmaq istəyən abituriyentlərin SAT imtahanından “Riyaziyyat” bölməsi üzrə ən azı 600 bal toplamaları tələb olunur. Qeyd olunan şərtləri ödəyən abituriyentlər müsabiqəyə buraxılmaları üçün aşağıdakı qaydada sənəd qəbulunda iştirak edirlər:
- Abituriyentlər martın 5-dək ümumi qaydada “Abituriyentin elektron ərizəsi”ni doldurur və təsdiq edirlər (etdirirlər);
- İyunun 30-dək SAT imtahanının nəticəsini elektron şəkildə “College Board”un saytı (https://www.collegeboard.org) vasitəsilə DİM-ə (kod 7876) və ADA Universitetinə (kod 7799) göndərirlər;
- İyunun 30-dək SAT imtahanının və ingilis dili imtahanının nəticələri barədə məlumatı (skan edərək) elektron qaydada təqdim etməklə DİM-in internet saytı vasitəsilə qeydiyyatdan keçirlər;
- İyunun 30-dək ADA Universitetinin elektron ərizə formasını (www.ada.edu.az/apply) doldurur, ingilis dili imtahanının nəticəsini həmin ərizə formasına yükləyir və ADA Universitetinə elektron şəkildə göndərirlər.
ADA Universitetinə SAT imtahanlarının nəticələrinə əsasən qəbul olmaq istəyən abituriyentlərin qəbul imtahanının I mərhələsində (buraxılış imtahanında) riyaziyyat fənni üzrə 40 bal və yuxarı nəticə göstərməkləri tələb olunur. Əvvəlki illərin məzunları imtahanı yenidən verdikləri halda qəbul zamanı ən yüksək balı nəzərə alınacaqdır.
ADA Universitetinə SAT imtahanlarının nəticələrinə əsasən qəbul olmaq istəyən abituriyentlərin Azərbaycan dili (dövlət dili) fənni üzrə “məqbul” almaları, tam orta təhsil müəssisələrinin Azərbaycan bölməsini bitirən abituriyentlərin buraxılış imtahanında (qəbul imtahanının I mərhələsində) tədris dili (Azərbaycan dili) fənnindən 50 bal və yuxarı nəticə göstərməkləri tələb olunur.
ADA Universitetinin “Hüquqşünaslıq” ixtisasına SAT imtahanının nəticələrinə əsasən qəbul aparılmır.